Telemarksavisa om Solbøn på Dyre Vaa Samlingane på Rauland: "Songlaget i Bondeungdomslaget i Oslo under leiing av Brit Karin Wetteland, viste seg å vera eit kvalitetskor som heldt publikum på strak arm i ein generøs time."

Songlaget vart oppretta i 1914 og har sidan markert seg som eitt av dei mest aktive amatørkor her i landet. Gjennom alle år har koret hatt det som si viktigaste målsetjing å ta vare på norske song- og musikktradisjonar. Saman med dirigent Brit Karin Wetteland har Songlaget dei siste åra vigd mykje tid til den norske folkemusikken, og koret har søkt å tileigna seg dei stiltrekk og den syngemåte som særpregar den tradisjonelle norske folkesongen. På same måte som folkemusikken er vidareført frå generasjon til generasjon ved munnleg overlevering, har koret i stor grad tileigna seg desse melodiane gjennom lytting. Det er lagt vekt på at kvar enkelt songar finn sin eigen individuelle måte å gjera til dømes krulling og andre ornament, noko som er med på å gje meir liv til klangbiletet samstundes som det tek i vare det folkelege uttrykket i melodiane.

Kontakt Songlaget på songlaget@gmail.com