Folkeeventyra – The Musical er ei lettare absurd og humoristisk reise med dei kjende og kjære figurane vi kjenner frå Asbjørnsen og Moe sine eventyr, pakka inn i eit herleg musikalsk univers. Dette kan du oppleve i Teatersalen 13. -19.juni og billettar kan du få kjøpt allereie no.

Asbjørnsen og Moe treng ein bestseljar, og dei treng han no. Kjem dei ikkje snart opp med noko som sel, så er det kroken på døra. På jakt etter inspirasjon og dei verkeleg gode historiene legg dei ut på ei reise og treff Espen Arne. Ein fyr med møkk i trynet og raud hjelm på hovudet, som nettopp har fått eit brev frå kongen.

På sin veg for å samle eventyr, møter Asbjørnsen og Moe Bukkane Bruse og Trollet under brua, Dovregubben, Revtsjenka (Reveenka), Pannekaka – og mange fleire! Men dei oppfører seg kanskje ikkje heeeilt slik vi hugsar dei frå eventyra?

Teaterlaget er eit av fire særlag i Bondungdomslaget. Stifta som Spellaget i 1914 og har sidan då hatt godt over 120 framsyningar og over 500 skodespelarar på scenen, dei fleste i Teatersalen i Rosenrantz´gate 8. I vår har dei kasta seg på ein musikal med stor M og det blir song, dans og eventyr for både store og små.

Velkommen til premiere på Folkeeventyra – The Musical laurdag 13. juni 16.00!