Frå joggesko til bunad – med kongeleg besøk
I april fekk vi verkeleg synt breidden i aktiviteten vår. Veka fram til Sentrumsløpet 22. april, fylte IL i BUL huset med springeglade folk og ASICS EXPO i Teatersalen. Vi fekk såvidt tid til å rydde vekk joggeskoa, før det 26. april var duka for bunadsfest med kongeleg besøk, arrangert av Noregs Ungdomslag.
Sentrumsløpet 2023
Sentrumsløpet 22. april var eit vellukka arrangement, med strålande vêr og over 9600 deltakarar. Etter to år med pandemi var det ei lette for IL i BUL å endeleg kunne gjennomføre Sentrumsløpet utan restriksjonar. Nytt av året var fartshaldarar, nedteljingsskjermar ved startstreken og After Run på Kaffistova. Dette såg ut til å bli godt mottatt.
IL i BUL har fått gode tilbakemeldingar frå deltakarar og det er allereie om lag 1200 påmelde til 2024.
Bunadfest med kongeleg besøk
26. april arrangerte Noregs Ungdomslag bunadfest i Teatersalen. Celebre gjestar som HKH Kronprinsesse Mette-Marit, ordførar Marianne Borgen og Grunde Almeland var med på å kaste glans over arrangementet.
I tre år har NU jobba saman med Norges Husflidslag, Norsk folkedraktforum, Norsk institutt for bunad og folkedrakt og Studieforbundet kultur og tradisjon for å nominere bunadbruken i Noreg til UNESCOs liste over immateriell kulturarv. Søknaden er nå sendt inn, og det er vel verdt ein fest!
Det var fine talar og presentasjon av prosjektet, og Leikarringen i BUL Oslo dansa.
Les meir på https://bunadbruk.no og sjå fine bilete frå feiringa på https://kongehuset.no.
