Føredrag med:
Øivind Storm Bjerke – Kunstnaren Aksel Waldemar Johannessen
Arild Bye – Uppdal og Johannessen – arbeidarfolket i kunsten
Lagsleiar i BUL Terje Svindseth ønskjer velkommen
Stad: Nynorskens hus, Teatersalen i Rosenkrantz» gate 8
Tid: 26. oktober 2022 kl. 18.00–20.00
Inngang kr 100, sal på førehand og ved døra (TicketCo)
Sal av kaffi og kake
Aksel Waldemar Johannessen var i utgangspunktet ein dyktig treskjerar og mønsterteiknar, som utdanna seg vidare til bilethoggar og etterkvart målar. Johannessen er knytt til miljøet som danna seg omkring det nyoppretta Det Norske Teatret. Som ung var han knytt til framståande treskjerarverkstader i tida og deltok fleire gongar med skulptur på Høstutstillingen. Som mønsterteiknar har han ein sikker posisjon som pioner innom bruken av ornament tufta på interessa for tidlegare dekorativ kunst omsett til mønster for broderi omkring 1900–1930. Saman med kona skapte han merkevaren «Heimen», som framleis er ein institusjon i Oslo. Som målar stilte han aldri ut, men vart ein sensasjon då kunsten vart vist i ei minneutstilling kort etter han var død.
I dette føredraget vil professor Øivind Storm Bjerke sjå Aksel Waldemar Johannessen sitt livsverk under eitt. Han vil drøfte om det som gjer kunstnaren så interessant i dag, er korleis han tar opp elementa knytte til spenninga mellom dei ulike kunstformene han arbeidde innom. Ikkje minst er Johannessen bruk av motiv og modellsr knytte til teaterframsyningane og skodespelarane ved Det Norske Teatret, noko som kan forklare særeigenheiter i bileta hans, både når det gjeld stil, målerisk utføring og symbolinnhald. Han vil også stille spørsmålet om kvifor Aksel Waldemar Johannessen ikkje har fått den rolla som han burde hatt, i den no så aktuelle diskusjonen om dekanoniseringa – altså ein revisjon av den kunstnariske kanonen.
Arild Bye skriv i sin biografi om Uppdal korleis Johannessen og Uppdal har ei sterkt sameint tilnærming til arbeidsfolk i kunsten sin. Han har også ein teori om at når dei to kunstnarane blir haldne utanfor kjernen av kunstnarar i nynorskkrinsar, er det eit resultat av forholda dei begge hadde til alkohol og rusmiddel – nynorskrørsla var i stor grad også ei fråhaldsrørsle.
Dette er det første av fire seminar i Nynorskens hus om Johannessen si omfattande verksemd. Utgangspunktet er at det er hundre år sidan han døydde 25. oktober, og i januar 2023 er det 100 år sidan den første utstillinga på Blomqvist.
